رواية تضحية ألم - الفصل الأول

 اللهم أرحم أبي وأغفر له وأسكنه فسيح جناته. 

اللهم اجعل قبر ابي روضة من رياض الجنة. 

رواية# تضحية ألم #

زينب سعيد القاضي. 

                      الفصل الاول

صراخات عالية تملئ المكان ونساء كثيرة متلحفين بالسواد جوار تلك السيدة الراقدة علي الفراش مغطي وجهها لا حول ولا قوة بعد أن غادرت الروح إلي بارئها وعلي جوارها علي نفس الفرش تجلس فتاة صغيرة بالرابعة عشر من عمرها تضم أشقائها الفتاة تصغرها بعام والفتي يصغرها بعامين والصغري بالعاشرة من عمرها وتجلس صامدة وهي تضمهم بقوة داخل أحضانها ليستمدوا القوة منها فقد فارقت والدتهم الحياة ولم يبقي لهم أحد فوالدها توفي منذ كانت بالخامسة من عمرها وها هي والدتها فارقتهم هي الآخري ليلفت إنتباها أصوات النساء من حولها.

فهم ينظروا لهم بشفقة لتسترق السمع لإحداهم التي تتحدث بحسرة:يعني عليكوا يا ولاد وليكوا عم ولا خال مين هيربيهم ؟

لتتحدث آخري بالامبالاة:هيودوهم ملجأ ولا حاجة.

لتتحدث آخري بتهكم:أو احداث يا أختي ما دول مسيرتهم للشارع.

آخري بتأكيد: عندك حق يا أختي.

لتتحدث آخري بإشفاق:حرام عليكم أيه إلي بتقوله ده مش شايفة حالة العيال إلي تصعب علي الكافر بدل ما تقولوا ناخدهم نربيهم.

لتتحدث احداهم بتهكم:هو احنا لاقين ناكل .

وأخري بسخرية:يا أختي أحنا بنربي عيالنا بالعافية.

لتتحدث آخري بمكر:يا اختي انتي وجوزك أول ناس هتطردوهم من الشقة.

السيدة بزمجرة:لا مش هنطردهم يا أختي مش أحنا إلي نيجي علي يتامي ربنا مكرمنيش أنا وجوزي غير ببنت أهو نربيهم معاها وكفاية كده الي عندها كلمة عدلة تقولها والي معندهاش تنقطنا بسوكتها احترموا حرمة الميت ويلا بقي علي بره عشان المغسلة جاية.

لينهض النساء علي مضض ويغادروا الغرفة لتقترب من الأطفال وتتحدث بخفوت:يلا يا بتول قومي يا بنتي أنتي وأخواتك المغسلة جاية .

لتنظر لها بتول بتية وتردد بشرود:حاضر.

لتنهض بتول وهي تحادث أخواتها برفق:يلا عشان نخرج.

باسل بدموع: خلاص يا بتول مش هنشوف ماما تاني.

حلا بدموع:أنا عايزة ماما.

هنا بدموع:خليني قاعدة معاها. 

بتول بصلابة:ماما دلوقتي فوق في السماء يلا بقي بوسوا ماما عشان نخرج.

لترفع بتول الغطاء برفق ويقبل باسل جبينها بطفولة وكذلك حلا وهنا ليغادروا خارج الغرفة لتقترب بتول من والدتها وتقبلها برفق وتتحدث في أذنها بخفوت:نامي وارتاحي يا ماما أوعدك اني هبقي أنا وأخواتي أحسن الناس يا ماما وهيحلفوا ويتحالفوا بينا أوعدك لتضع الغطاء مرة آخري علي وجهها وتتجه للخارج هي الأخري…..

……… …..

بعد فترة تأتي المغسلة وتدخل الغرفة وبرفقتها بعض النساء ويقوموا بتغسيلها وتعطير جسدها وتكفينها وبعدها يحضر الرجال ويقوم بآخذها للمقابر كي يتم دفنها وخلفهم بتول الذي تسير وهي تمسك أشقائها بقوة في جنازة والدتها وتوديعها في مثواها الأخير …. 

بعد إنتهاء العزاء الذي كان يتضمن نساء ورجال الحارة فقط.

صعد العم جاد صاحب العقار ليطرق الباب ويدخل ليجد زوجته تجلس برفقة الأربعة أطفال وتحاول إطعامهم دون فائدة.

ليقترب منهم ويحادث زوجته بتساؤل:أيه يا سماح مش راضين يأكلو ؟

سماح بحزن:مش راضين.

ليزفر جاد ويتحدث بإشفاق:لا حول ولا قوه الا بالله يا ولاد كلوا الأكل والشرب ملوش دخل بالحزن.

لتتحدث بتول بخجل: شكرا يا عم جاد كتر خيركم إلي عملتوه معانا ويبقي كتر خيرك لو سيبتنا قاعدين في الشقة وبإذن اول الشهر هدفع ليك الايجار.

جاد بعتاب:عيب يا بنتي إلي بتقوليه أحنا اهل.

بتول بخجل:تسلم يا عم جاد أنا من بكرة هنزل ادور علي شغل واصراف علي أخواتي.

سماح بصدمة:شغل أيه بنتي أخص عليكي هو أحنا أصرنا في حاجة يا ندامة.

بتول بإحراج:كتر خيركم لغاية كده اخواتي أنا أولي بيهم.

جاد بقلة حيلة: بس هتشتغلي أيه بنتي أنتي عيلة عندك ١٤سنين يا دوب ؟

بتول برضا :بإذن الله هلاقي ربنا مش هيسبنا هروح بكره المشغل إلي كانت ماما شغالة فيها يمكنك يشغلوني اي حاجة.

جاد بقلة حيلة:طيب ودراستك ؟

بتول بحزن:إلي ربنا عايزه يا عم جاد هعمل ايه ؟

جاد بقلة حيلة:لله الامر من قبل ومن بعد يلا يا سماح نسيب العيال تنام.

سماح بلهفة:طيب يا حاج نامو في الأوضة التانية يا ولاد بلاش الأوضة بتاع امكوا.

بتول بحزن:حاضر يا خالتي.......

لتنهض سماح وتغادر برفقة زوجها وهي تنظر للاطفال بأسي..

لتلتفت أخيراً لأشقائها الذين يبكون بصمت وتتحدث برفق:خلاص بقي بطلوا عياط ماما كده هتزعل منكم.

حلا بدموع: خلاص يا بتول مش هنشوف ماما ؟

بتول بحزن:ده إرادة ربنا يلا ننام.

هنا بدموع :بس أنا كنت متعودة أني أنام في حضن ماما ؟

بتول بحب:هتنامي من هنا ورايح في حضني يا ست هنا.

باسل بدموع:وأنا هتسبوني لوحدي؟

بتول بلهفة:لا طبعاً هتنام جنبنا أحنا مش هنتفرق أبدا وهنفضل ايد واحدة يلا قوموا عشان ننام.

لينهضوا ثلاثتهم ويتجهوا للغرفة الآخري ويتمددوا علي الفراش وفي وسطهم بتول تضمهم بحنان فطري.......

.............

علي الجانب الآخر يجلس جاد وزوجته سماح يتناولوا الطعام لتتحدث سماح بأسي:العيال دول قطعوا قلبي أوي يا جاد.

جاد بحزن:عندك حق.

سماح بلهفة:منجبهم نربيهم من بنتنا ؟

جاد بحزم:لا طبعاً مش هينفع أنتي ناسية إن ليهم اخ ولد واحنا عندنا بنت ؟

سماح بحزن:بس ده لسه صغير.

جاد بتهكم:بس مسيره يكبر وأنتي عارفة أن الكلام الناس مش بيخلص كل الي أقدر عليه اعفيهم من الايجار وكل يوم والتاني نبعت ليهم أكلة حلوة.

سماح بدعاء:الله يبارك ليك يا شيخ ويطعمك ما يحرمك.......

.......

بدأ النهار بالبزوخ وأبتلعت الشمس ظلام الليل معلنة عن بداية يوم جديد ..

تفتح عيونها بوهن فهي بالأساس لم تنم إنما ظلت مستيقظة طوال الليل تفكر في طريقة لإيجاد أموال للصرف علي إخوتها وتنفيذ وصيتها لوالدتها لتلتفت لاخواتها لتجدهم نائمين في عمق لتنظر لهم بحنان وتنهض بحذر حتي لا تيقظهم وتقوم بتغير ملابسها المكونة من عباءة سوداء وحجاب أسود متوسطين الحال لتتجه للخارج وتفتح باب الشقة لتجد السيدة سماح تقف علي باب الشقة حاملة الإفطار.

لتتحدث بتول بوهن:صباح الخير يا خالتي.

لتضم سماح حاجبيها بحيرة وتردد بتعجب: راحة فين يا بنتي علي الصبح كده ؟

بتول بهدوء:راحة ادور علي شغل.

سماح بتردد: الصبح كده دي الساعة سابعة يا بتول.

بتول بأسي :الرزق مش بيستني حد يا خالتي.

سماح بلقب منفطر:طيب كلي لقمة أنا جايبة ليكوا الفطار اهو.

بتول بإمتنان: شكراً يا خالتي كتر خيرك لتاخذه منه وتضعه علي الطاولة وتعود مرة آخري وتتحدث بتوتر خدي بالك منهم يا خالتي عقبال ما ارجع.

سماح بإشفاق:أطمئن يا بنتي في عنيا لتتحدث بلهفة معاكي فلوس ولا أجيبلك.

بتول بكذب:معايا يا خالتي مستورة الحمد لله.

سماح بحزن:دائما يا بنتي.

بتول بحزن:يلا همشي أنا سلام عليكم.

سماح بحزن:وعليكم السلام ربنا يجعلك في كل خطوة سلامة يا بنتي......

............

تقف أمام المشغل الذي كانت والدتها تعمل به وهي تنهج بشدة من كثرة المشي فهي لم تأخذ من الأموال التي وجدتها في جزدان والدتها تركته وقررت المجئ سيرا علي الاقدام وها قد وصلت بعد السير لمدة ساعة ونصف لتسمي الله وتدخل المشغل ليقابلها اصدقاء والدتها بحرارة لتتجه بعدها لصاحبة المشغل لترحب بها هي الأخري وتقوم بتعزيتها وتجلس معها بتول بإستحياء.

لتردد السيدة وصال بتساؤل:خير يا بتول يا بنتي محتاجة حاجة ؟

بتول بتردد :أنا عايزة أشتغل.

لتضم وصال حاجبيها بحيرة:تشتغلي ؟ ازاي يا بتول أنتي بتدرسي ولسه صغيرة وبعدين بتعرفي تخيطي أصلا ؟

بتول برجاء: هتعلم خياطة بإذن أو شغليني أيه حاجة أن شاء الله أنضف المشغل حتي أنا محتاجة اشتغل عشان اصرف علي اخواتي.

وصال بحيرة:هو أنت ملكوش حد ؟

بتول برفض:لا ملناش غير ربنا.

وصال بقلة حيلة:ونعم بالله طيب لو اشتغالتي هتدرسي ازاي ؟

بتول بلهفة:مش مهم اسيب الدراسة.

وصال بتفكير:طيب هقولك انتي تروحي مدرستك وتيجي من الساعة ١الظهر ل ٩بالليل يناسبك ؟

بتول بلهفة: موافقة جداً.

وصال ببشاشة:طيب تمام يا اسعاد تعالي عايزاكي لتنهض إحدي السيدات من أمام مكينة الخياطة وتقترب منهم لتردد بتساؤل نعم يا حاجة ؟

وصال بهدوء:هتاخدي بتول تعلميها تتدرب تحت إيدك كام يوم وبعدين تشتغل مكان امها.

اسعاد بحيرة:بس دي لسه صغيرة يا حاجة وكمان بتدرس.

لترد بتول بلهفة:اتفقت مع الحاجة علي المواعيد وكل حاجة.

وصال بإبتسامة:أهي قالت ليكي اهه خديها معاكي يلا.

اسعاد بطاعة :تمام يا حاجة يلا يا بتول يا بنتي.

لتنهي بتول وتذهب مع اسعاد وتجلس جوارها وتراقبها بتول بتركيز تام.......

……........

يفتح باسل عيونه ليجد حلا وهنا مازالوا نائمين ليقوم بإيقاظهم برفق كي يتستيقظوا:حلا أصحي وأنتي يا هنا يلا .

لتفتح عيونها بضعف وتردد بنوم:سيبني انام يا باسل.

ليتحدث باسل بتساؤل: هي بتول فين ؟

حلا بنوم: معرفش سيبني انام.

لينظر لها باسل بقلة حيلة ويغادر الغرفة بحثا عن شقيقته بارجاء الغرفة لكن خاب أمله ولم يجدها حتي بغرفة والدتهم الراحلة ليجلس علي الأريكة المتهالكة الوحيدة الموجودة بالصالة ليجلس عليها بإهمال ليجد الإفطار موضوع علي الطبلية  "طاولة صغيرة" ليضع يده علي بطنه الذي تصدر اصوات من الجوع فهو لم يتناول الطعام منذ صباح الامس ليتجه للطبلية ويجلس أرضاً يتناول إفطاره بنهم شديد.

لتستيقظ حلا وتتبعها هنا هي الأخري ويخرجوا من الغرفة ويجدوه يجلس يتناول طعامه ليجلسوا جواره ويتتناولوا معه الإفطار لينتهوا بعد فترة وينهضوا من علي الأرض ليتحدث 

باسل بحيرة:الأكل خلص لما بتول تيجي هتاكل أيه ؟

حلا بالامبالاة:هتلاقيها فطرت قبل ما تخرج تفتكر راحة فين ؟

ليضم باسل حاجبيه بحيرة :مش عارف .

هنا بتوجس:تفتكر سبيتنا هي كمان زي ماما ؟

باسل رفض:ماما ماتت يا حلا راحت عند ربنا يا حبيبتي وبعدين بتول هتسيبنا وتروح فين.

حلا بقلق : مش عارفة أنا خايفة متيجي نروح نسأل خالتك سماح ؟

باسل برفض:بلاش نقلق الناس شوية وهتيجي أن شاء الله.

مر الوقت وهما في إنتظار مجيئها دون فائدة حتي آذن العصر ولم تعد أيضاً ليصابوا بخيبة الأمل وسرعان ما إختفت بعد سماعهم طرق علي باب الشقة ليهرعوا كلاهم وهم يرددوا بإسمها لتصيبهم خيبة الأمل عندما يجدونها جارتهم الخالة سماح.

ليردد باسل بخيبة أمل:أنتي يا خالتي افتكرتك بتول.

سماح بحيرة:هي بتول لسه مرجعتش ؟

باسل بلهفة:أنتي تعرفي هي فين ؟

سماح بإيجاب:راحت تدور علي شغل.

ليتنفسوا الصعداء ليردد بفضول :متعرفيش راحت فين ؟

سماح بحيرة:هي كانت بتقول هتروح المشغل الغايب حجته معاها أنتوا فطرتوا يا ولاد ؟

باسل بإيجاب:أيوة يا خالة .

سماح براحة:طيب الحمد لله خد صنية الغداء أهه وهات صنية الفطار.

باسل بإحراج:كتر خيرك يا خالة كفاية الفطار.

سماح بعتاب:بطل عبط يا واد أن زي أمك الله يرحمها.

باسل بحزن:الله يرحمها.

سماح بتذمر:يلا خد بقي الصينية لتعدينا أنا أدخلها وسع وسع لتزيحه جانباً وتضع الصينية علي الأريكة وتأخذ الصينية 

الفارغة وتردد بتساؤل:محتاجين حاجة تاني يا ولاد ؟

باسل بإحراج:شكرا يا خالة.

لتغادر سماح ويغلق باسل خلفها الباب وتردد حلا بغيظ :مش بحب الست دي.

باسل بحيرة: ليه يا بنتي دي ست طيبة.

حلا بغلاظة:طيب بس حشرية.

باسل بوهن:يوه يا حلا مش وقتك.

حلا بجوع وهو تنظر للطعام:أنا جعانة هتغدا تعالوا كلوا .

باسل بتردد :مش هنستني بتول.

حلا بالامبالاة:أكيد أكلت بره خلينا نأكل.

باسل بجوع:يلا.

ليجلسوا أرضاً وبعد أن وضعوا صينية الطعام أرضا وبدأوا تناول الطعام بنهم حتي ان انهي كل واحد نائبه في الطعام.

لتنظر حلا لنائب بتول وتردد بتلذذ: اللحمة طعمها حلو أوي بقالنا شهور مكألناش لحمة.

باسل بشبع:أه الحمد لله كتر خيرهم.

حلا بجوع:ما تيجي ناكل الحتة إلي فاضلة دي.

باسل برفض:لا ده نايب بتول لما ترجع.

هنا برفض:لا ده نصيب بتول. 

حلا بجوع:بس أنا لسه جعانة وهي أكيد أكلت بره ؟

باسل بإشفاق:كليه ياحلا وخلاص.

لتبدأ في تناوله بنهم تحت نظرات هنا الممتعضة........

........... 

تجلس سماح برفقة زوجها وطفلتها يتناولوا الغداء ليردد جاد بتساؤل:وديتي أكل للولاد ؟

سماح بإشفاق:أه وديت الغداء ولقتيهم يا كبدي مخلصين صنية الفطار من الجوع.

ليلتفت لها جاد بتساؤل:بتول رجعت ؟

لتحرك رأسها برفض: لا لسه يا حاج .

جاد بقلق: أتأخرت أوي.

سماح بتأييد: أيوة.

جاد بتفكير:لما المغرب يأذن هروح أصلي في المسجد وادور عليها.

سماح بفرحة:ياريت يا حاجة يبقي كتر خيرك دي بت يتيمة ملهاش حد.

جاد بعتاب:وانا مش هسيبهم يا سماح لو علي رقبتي ربنا يقدرني.

سماح براحة:يراضيك يا حاج ويعوضه خير في مها بإذن الله......

............

تعتدل في جلستها أخيراً وهي تان من كثرة الالم لتنظر لها السيدة إسعاد بإشفاق:معلشي يا بتول يا بنتي الشغل في الاول صعب لكن مع الوقت هتتعودي.

بتول بوهن:ولا متعودتش مش هتفرق يا خالة.

اسعاد بتساؤل:بردوا مش عايزة تقومي تجيبي ليكي لقمة تاكليها ؟

بتول برفض :لا يا خالتي خلينا نخلص عشان أروح.

اسعاد بتساؤل:يا بنتي أنتي مرضتيش تتغدي معانا وقلتي شبعانة خلاص المغرب هياذن ده كله مجوعتيش ؟

بتول بكذب:مش جعانة يا خالة يلا بس نكمل شغل الله يباركلك عشان الحق أروح لأخواتي.

اسعاد بقلة حيلة:ماشي يا ستي ركزي معايا لتكمل اسعاد الشرح لها حتي ليرتفع اذان المغرب وحان موعد الذهاب للمنزل .

لينهض النساء ويتجهوا للحاجة وصال وكل واحدة تأخذ يوميتها لتقف بتول في إحد الأرجاء بتوتر فهي بالتأكيد لن تأخذ شئ فهي لم تعمل من الأساس لتأخذ أجرا ليأخذ الجميع أجرته ويغادروا إلي منازلهم ولكن السيدة وصال تناديها لتتجه لها بتوتر:أيوة يا حاجة ؟

وصال بإبتسامة: أتفضلي يا ستي يوميتك.

بتول بحيرة:بس أنا مشتغلتش أصلاً عشان أخد فلوس  !

وصال ببشاشة:بس كنت بتدربي وكمان بتساعديهم يلا خدي.

لتمد بتول يدها وتأخذ الأموال بخجل لتتحدث وصال بتوضيح:شوفي بقي يا ستي اليومية ب٥٠ ج يعني ١٥٠٠في الشهر المشغل بيشتغل وردتين يعني دلوقتي البنات التانية هتيجي وأنتي هتقعدي شوية معاهم لغاية٩ بالليل زي ما اتفقنا.

بتول بفرحة:حاضر بكرة هروح المدرسة وواحدة بالدقيقة هكون هنا.

وصال بإبتسامة:ماشي يا بنتي يلا روحي لأخواتك.

لتبتسم بتول بسعادة وتغادر إلي الي منزلها لتصطدم بجسد ضخم عند خروجها لتبتعد وتردد بخجل وهي تنظر أرضاً: أسفة .

قالتها وغادرت سريعاً حتي أنها لم تستمع لحديث الطرف الآخر لينظر هو في آثرها بإعجاب ويردد :صغيرة بس فرسة .

ليتجه للداخل ليجد والدته تجلس وتقوم بتدوين بعض الطلبيات ليتحدث ببرود:سلام عليكم.

لترفع وصال عيونها عن الدفتر وتردد بتساؤل:جاي بدري ليه يا شادي ؟

ليقلب عيونه بملل: جيت متأخر مش عاجبك جيت بدري مش عاجب.

لتزفر بضيق وهي تحرك رأسها بغيظ من حديثه.

ليردد بفضول:صحيح مين البنت الي لسه خارجة ؟

يتبع........

بقلم زينب سعيد القاضي.